Praza do Campo, 1. 15850. Zas. A Coruña.
+(34) 981 70 83 03
A Semana Cultural de Zas continúa cun roteiro, obradoiros e humor
29-07-2019
Mañá martes, 30 de xullo, teremos unha nova xornada da Semana Cultural organizada polo Concello de Zas con actividades para todos os gustos. A primeira cita será ás 12:00 horas no Centro Sociocultural de Zas co grupo de teatro Trinke Trinke que nos traerá unha sesión de contacontros infanfil que leva por título “Avós”.
Como dicíamos en anteriores ocasións, o noso patrimonio terá un lugar destacado dentro da programación da Semana Cultural. E unha das citas con el será mañá a través da “Visita ao patrimonio natural, etnográfico e arqueolóxico do Concello de Zas” guiada polo historiador Xosé María Lema. Ás 15:30 horas sairemos do Centro Sociocultural de Zas para dende alí movernos en autobús ata lugares do noso municipio cun enorme valor como a Carballeira de Baio, Pedra Vixía ou as Torres do Allo, entre outros. Aconséllase levar auga e roupa e calzado axeitado xa que haberá que facer pequenas andainas e para asistir é necesario anotarse previamente no número de teléfono 981 751 398 ou no Centro Sociocultural de Zas.
Pero na tarde haberá máis propostas que esta. Unha delas é o obradoiro de cociña “Doces e lambetadas saúdables” que impartirá a partir das 16:30 horas a dietista Sonia Ferreiro e que está dirixido a nenos e nenas de 5 a 12 anos. Será no Centro Sociocultural de Zas. Un pouco despois, ás 17:00 horas, e o no mesmo lugar, o grupo de baile tradicional Churía impartirá o obradoiro “Como vestir o traxe tradicional”. No taller abordaranse as diferentes pezas que compoñen o traxe tradicional así como a súa colocación. Esta é unha actividade dirixida a pais /nais e alumnado da escola de baile Churía e a todas as persoas interesadas. A esa mesma hora continuará o curso de iniciación ao baile tradicional que se imparte a longo de toda a semana.
O peche desta terceira xornada da Semana Cultural de Zas, chegará en clave de humor da man de Oswaldo Digón. “Anecdoloxía” é o título do monólogo que nos ofrecerá a partir das 21:30 horas no Centro Sociocultural de Zas e que se basea en diferentes vivencias que ten escoitado, vivido ou lido mentras agardaba nun aeroporto, viaxando en tren ou simplemente sentado nunha cafetería.
Todas as actividades son de balde.
