Chega a 35ª edición da Festa da Carballeira de Zas
07-06-2018
A Festa da Carballeira de Zas chega este ano cun cartel máis folk ca nunca. Once grupos, dous días de concertos, gastronomía e actividades para toda a familia son os principais ingredintes desta festa tradicional que se celebra na Carballeira de Velar os días 3 e 4 agosto.
Esta mañá presentouse o cartel nun acto oficial ao que asistiron o Alcalde de Zas, Manuel Muíño Espasandín; a Vicepresidenta e Responsable da área de Cultura da Deputación de A Coruña, Goretti Sanmartín; o Director do Festival e membro da Asociación Cultural Castro Meda, Fidel Otero e o responsable de patrocinios musicais de Estrella Galicia, Víctor Mantiñán.
Serán dous días de concertos con grupos folk de primeiro nivel e de diferentes puntos xeográficos. A 35ª edición abrirase o venres, 3 de agosto, despois dunha completa Semana Cultural organizada polo Concello de Zas a través da súa Concellería de Cultura. Os galegos Pelpepau, a irlandesa Niamh Ní Charra, Ses e The Fatty Farmers serán os encargados de tocar o venres pola noite.
Xa o sábado pola noite, actuarán os galego Xabier Díaz coas Adufeiras de Salitre que traerán a Zas o seu novo disco, Noró; o grupo xaponés Harmonica Creams; os escoceses Mànran e pecharán a noite os galegos Astarot.
Pero o sábado, a festa xa comeza a partir das 14:00 horas cunha sesión vermú na que a gastronomía e as xuntanzas familiares se misturarán coa música de Caxade. Seguirán amenizando a sobremesa os Farrapos e Cé Orquesta Pantasma. E xa pola tarde, serán varios os grupos de música e baile tradicional da comarca os que se xunten na Gran Foliada que terá lugar durante a tarde do sábado.
As entradas para o festival xa se poden mercar na páxina www.festadacarballeira.com e a través de Ticketea, cun prezo especial de 10€ o bono de dos dous día durante o mes de xuño. En xullo pasará a costar 12€ e a venda en taquilla será de 15€, bono de dous días.
Ei Carballeira!
