Portal cidadán do Concello de Zas

A III Mostra de Teatro Afeccionado “Labarta Pose” levanta o telón

08-04-2018

Por terceiro ano consecutivo, a Mostra de Teatro Afeccionado “Labarta Pose” organizada polo Concello de Zas levanta o telón. Será o próximo día 21 de abril no auditorio de Zas coa obra “O5 CO2NO5 50N COU54 D€ 3”  de Tiruleque, un grupo de teatro chegado dende O Carballiño.

As representacións continuarán os catro sábados seguintes, 28 de abril e 5, 12 e 19 de maio. E xa o domingo, 27 de maio, terá lugar a entrega de premios que se celebrará xunto coa clausura da XI Escola Municipal de Teatro Infantil. Como novidade, este ano, dentro da Mostra de Teatro inclúese unha obra dirixida especialmente ao público infantil. Que será o 19 de maio no Auditorio de Zas. O resto das obras de teatro comezan ás 21 horas e repartiranse entre os escenarios do Auditorio de Zas e o de Baio.

“Serán cinco sábados con espectáculos chegados dende distintos puntos do país” sinala Manuel García Velo, Concelleiro de Cultura de Zas. A maior parte das obras de teatro están dirixidas a todos os públicos e as cinco son de acceso gratuíto.

Nesta terceira edición presentaronse un total de 19 obras de teatro das que cinco quedaron finalistas tras a selección do xurado composto por membros do Concello de Zas e do grupo de teatro Badius. A maior parte das obras que se representarán son comedia, ainda que tamén haberá drama e incluso teatro de sombras.

“Coa esta mostra de teatro queremos darlle visibilidade a todos os actores e actrices que adican boa parte do seu tempo libre ao teatro, ao teatro feito en galego e tamén contribuír á dinamización económica do noso concello”, sinala Velo.

Premios

Cada unha das obras que se representan recibirá 500€ xunto cun diploma acreditativo. Tamén haberá premios (un trofeo e un diploma acreditativo) para a mellor obra elixida polo xurado, para o mellor actor e a mellor actriz e para a mellor obra elixida polo público.