Praza do Campo, 1. 15850. Zas. A Coruña.
+(34) 981 70 83 03
O Concello de Zas instala trampas para a vespa velutina en puntos sensibles
19-03-2018
O Concello de Zas comezou esta semana a instalación de trampas para a vespa velutina nos puntos máis sensibles do municipio. Trátase dunha acción que se enmarca dentro da campaña de trampeo emprendida polo goberno municipal debido “á pasividade da Xunta” no control desta praga.
Todas as trampas están numeradas e etiquetadas co logo do Concello de Zas para que sexan facilmente recoñecibles co fin de que non se retiren, rompan ou muden de lugar. Cada quince días renovaranse e colocaranse novas trampas nas zonas máis vulnerables a esta praga.
A campaña de trampeo - posta en marcha polo Concello de Zas coa colaboración de Serpa; unha empresa especialista na extinción da vespa velutina - arrancou xa o pasado domingo cunha charla formativa na que participaron máis de 50 veciños e veciñas de todo o municipio. “A captura das vespas raíñas é fundamental para frear a propagación da praga” sinala Óscar Lema, Tenente de Alcalde de Zas. Precisamente a primavera é a época crucial para cazar as raíñas polo que a colaboración da veciñanza é fundamental na loita contra esta praga. Así, dende o Concello instan a todos os apicultores do municipio a que indiquen a localización das súas colmeas por ser éstes lugares sensibles ao ataque da velutina así como os puntos nos que aniñaron en anos anteriores.
Tanto a información como as dúbidas sobre o control desta praga poden resolverse chamando ao Concello de Zas (981 70 83 03).
O equipo de Goberno de Zas demostra así o seu compromiso para loitar contra esta praga ainda que considera que tanto o control como a sensibilización da poboación é competencia da Xunta de Galicia.
