Presentado o libro “Zas polo miúdo” que recolle a historia e a información máis relevante das 16 parroquias do noso municipio
17-11-2020
O Centro Sociocultural de Zas acolleu onte pola mañá a presentación do libro “Zas polo miúdo” no que se recolle información detallada das 16 parroquias que compoñen o noso municipio. Acompañada de máis de 400 fotografías, mapas e moitos outros datos fan que este libro se converta nun manual de consulta para toda a veciñanza. Xosé María Lema e Evaristo Domínguez Rial son os autores do libro xunto coa colaboración de Xosé Mª Rei Lema.
Este foi un proxecto que naceu no 2015 impulsado por Manuel García Velo, Concelleiro de Cultura entre o 2015 e o 2019. A idea xurdiu coa finalidade de dar a coñecer a historia de cada unha das parroquias do noso municipio e de poñer en valor o seu patrimonio formado por unha gran cantidade de igrexas, pazos, castros, mámoas, dolmens, carballeiras, fervenzas, ríos… A primeira parte deste traballo realizouse a través da páxina web e das redes sociais do Concello de Zas onde dende finais do 2016 se publicou mes a mes información sobre cada unha das parroquias. Dende entonces e até agora esta sección da web municipal recibiu unhas 10.000 visitas. “Este é un dos proxectos dos que me sinto máis orgulloso”, sinalou Velo durante a súa intervención.
Grazas á colaboración da Deputación da Coruña, o proxecto trasladouse ao formato papel. “Zas polo miúdo é unha obra de lectura e de consulta”, sinalou Xosé Regueira, Vicepresidente da Deputación da Coruña, durante o acto de presentación do libro. Regueira anunciou outros convenios do ente provincial co Concello de Zas que se levarán a cabo proximamente para darlle un novo impulso á promoción das Torres do Allo e da ponte de Brandomil. Regueira agradeceulle aos autores de “Zas polo miúdo” o seu traballo que o calificou de exemplo para o resto dos municipios da provincia.
Durante o acto de presentación do libro interviron os autores, Xosé María Lema e Evaristo Domínguez, que se encargaron de facer un repaso polos datos máis importantes que se recompilan na publicación. Ademais dunha ardua investigación, os autores apoiáronse en documentos de gran relavancia. Adiantaron que xa están traballando nunha segunda parte na que se recollerá a historia oficial do Concello de Zas a través das actas municipais.
A situación sanitaria actual fixo que o acto de presentación do libro quedase reducido a un número limitado de asistentes, entre os que estaban representados unha boa parte do tecido social e cultural do noso concello. O Alcalde de Zas, Manuel Muíño Espasandín, foi o encargado de guiar o acto e despois de agradecer o traballo dos autores así como a iniciativa de Manuel García Velo e a colaboración da Deputación recoñceceu que “este libro é un referente para o noso concello que nos axuda a recuperar a nosa memoria histórica”.
O volume, non venal, está a disposición da veciñanza en calquera das dúas bibliotecas municipais do Concello de Zas para a súa consulta. Ademais, proximamente poderá lerse no apartado de “Publicacións” da páxina web da Deputación da Coruña. Tania Carreira, Técnica de Turismo do Concello de Zas, encargouse da maquetación.
Libro de honra
Aproveitando a súa visita, Xosé Regueira, asinou o Libro de Honra do Concello de Zas na súa calidade de Vicepresidente da Deputación da Coruña.
