Portal cidadán do Concello de Zas

Abertas as inscricións para o DéporCampus Cabreiroá 2020 que acolle o Campo Municipal Platas Reinoso de Baio do 27 ao 31 de xullo

17-06-2020

 

Por cuarto ano consecutivo, o Concello de Zas e o Real Clube Deportivo da Coruña veñen de renovar a súa colaboración para poñer en marcha unha nova edición do DéporCampus Cabreiroá 2020 que terá lugar do 27 ao 31 de xullo no Campo Municipal Platas Reinoso de Baio.

Este campamento deportivo está dirixido a nenos e nenas de 6 a 14 anos e serán os técnicos do RC Deportivo os encargados de dirixir as diferentes sesións de adestramento nas que os participantes terán a oportunidade de mellorar as súas habilidades, gozar do xogo e facer novas amizades. 

Como principal novidade, aplicarase un protocolo especial fronte ao Covid-19. Así todos os participantes recibirán unha máscara oficial do RC Deportivo, xunto coa equipación DéporCampus. O protocolo de seguridade das medidas hixiénico - sanitarias pode consultarse aquí. Por este motivo, as prazas están limitadas. 

Inscricións

As inscricións están abertas ata o 23 de xullo ás 12:00 horas e pódense formalizar a través da seguinte ligazón: http://deporcampus.rcdeportivo.es/es/zas-2020/inscribete. As tarifas son de 120€ a normal e de 100€ a bonificada - entre os que están os xogadores do Club Deportivo Concello de Zas - e inclúen equipamento deportivo, máscara oficial do RC Deportivo, seguro de accidentes deportivos, auga e froita durante os adestramentos, diploma e sorteo de regalos.  

Para calquera dúbida sobre o proceso de inscrición pódese escribir directamente ao enderezo electrónico deporcampus@rcdeportivo.es.

“Agradecemos que o RC Deportivo escollera de novo as nosas instalacións para levar a cabo este evento deportivo que é un éxito ano tras ano e que co se fomenta o deporte e a deportividade”, sinala Manuel Muíño, Alcalde de Zas. Asimesmo destacou que nesta edición é necesario facer un esforzo por parte de todos para adaptarse ás circunstancias derivadas do Covid-19.