Portal cidadán do Concello de Zas

A feira de Baio retoma a súa actividade tras a declaración do estado de alarma

12-05-2020

 

O próximo domingo, terceiro de mes, Baio acollerá de novo a súa tradicional feira,  a primeira dende a entrada en vigor do actual estado de alarma. Dacordo coa normativa, na feira haberá só produtos agrícolas e de alimentación. 

A feira do próximo domingo, 17 de maio, celebrarase con novas normas de seguridade e hixiene adaptadas á crise sanitaria actual. Deste xeito, o Concello de Zas marcará os postos ao longo da avenida Vidal Ríos mantendo as distancias de seguridade establecidas. Para evitar que a celebración da feira supoña un risco de contaxio, é necesario extremar as precaucións tanto por parte dos compradores como dos vendedores. No caso dos compradores, deberán manter a distancia de seguridade interpersoal (de 1,5 a 2 metros), non tocar os produtos expostos e usar mascarilla. Por parte dos vendedores, as medidas pasan por manter a distancia mínima entre postos, levar mascarilla, facer uso do xel hidroalcohólico e desinfectar o posto varias veces. Membros de Protección Civil de Zas serán os encargados de controlar o aforo e de facilitarlle unha mascarilla a todas aquelas persoas que visiten a feira e acudan sen ela. 

Por outra parte, tras a entrada en vigor da Fase 1 da desescalada, retomarase a actividade do feirón de Baio, que se celebra o 1º martes de cada mes, así como o mercado mensual de Zas (1º luns de mes). En ambos casos haberá unicamente produtos agrícolas e de alimentación.

Produtores locais e hostalería

O Alcalde de Zas, Manuel Muíño, asegura que co fin de promover o consumo de proximidade dende o Concello están a falar con diferentes produtores locais e da zona para animalos a que traian os seus produtos de tempada á feira. “Animamos aos produtores a que aproveiten esta oportunidade para tratar de superar as perdas ocasionadas polo coronavirus e dar saída aos produtos que teñen en stock contactando directamente co consumidor final”, sinala Muíño.

Así mesmo, o Concello anima aos comercios locais a recuperar o pulso comercial e hostaleira tras o parón provocado polo Covid-19. Así, nesta primeira fase, ademais de permitirse a apertura de establecementos comerciais de menos de 400 metros cadrados tamén se establece a reapertura da hostalería e restauración coa reapertura das terrazas ao aire libre limitada ao 50% do número de mesas e establecendo un mínimo de 2 metros de distancia entre mesas. O ocupación máxima permitida por mesa é de 10 persoas.