Noticias por ano:

Remata o reparto das máscaras cirúrxicas adquiridas polo Concello de Zas

06-05-2020

Nun tempo para marca, en tan só día e medio, un equipo de voluntarios e voluntarias de Protección Civil repartiron as 4.500 máscaras adquiridas polo Concello de Zas. 

A distribución realizouse vivenda por vivenda de cada unha das 16 parroquias que forman o municipio de Zas onde deixaron un sobre con dúas máscaras de tipo cirúrxico de triple capa e con certificado CE para produtos sanitarios. Con esta medida, o Concello de Zas pretende que en todas as vivendas teñan dúas máscaras hixiénicas dispoñibles para utilizar no caso de que se vexan na obriga de ter que saír da casa e que non podan respectar a distancia de seguridade interpersoal. 

Despois de numerosas xestións debido á dificultade de conseguir este tipo de produtos de protección nestes momentos, o Concello de Zas adquiriu un total de 4.500 unidades. Tanto a compra da mercancía como o seu reparto fíxose seguindo os datos de poboación que manexa o Concello, onde actualmente están censadas un total de 4.472 persoas cunha media de dous habitantes por vivenda. 

Xunto coas máscaras, os veciños e veciñas do Concello de Zas recibiron un protocolo para facer un uso correcto das mascarillas entregadas que se resume nos seguintes puntos: 

  • Lavar as mans antes de poñela
  • Cubrir debidamente a boca e a nariz coa máscara
  • Evitar tocar a máscara mentras se leva posta
  • Cambiar a máscara cando estea húmida e non reutilizala
  • Para quitala, retirar pola parte de atrás sen tocar a parte frontal
  • Lavar novamente as mans

Dende o inicio desta crise sanitaria, o Concello de Zas repartiu diverso material de protección entre persoal do Centro de Saúde, persoal do Servizo de Axuda no Fogar, membros de Protección Civil, Policía Local e traballadores municipais que realizan as labores de desinfección nos exteriores dos espazos máis concurridos estes días pola veciñanza. 

 

* Podedes ver máis imaxes da entrega de máscaras na páxina de Facebook de "Concello de Zas Actualidade Municipal"

Compartir: